నేటి విశ్వాస నాయకురాలు
హన్నా మార్ష్మాన్
పరలోక పిలుపు : 05 మార్చి 1847
ఆధునిక మిషనరీ మార్గదర్శిని, విలియం క్యారీ సహాయకురాలు, సువార్తికురాలు, విద్యావేత్త.
హన్నా మార్ష్‌ మన్ (1767–1847) భారతదేశానికి వచ్చిన మొదటి మహిళా మిషనరీలలో ఒకరు, ఈమె భర్త జాషువా మార్ష్‌మన్, విలియం క్యారీలతో పాటు సెరంపూర్ మిషన్ లో కీలక సభ్యురాలు. ఈమె భారతదేశంలో స్త్రీలకు విద్యనందించటంలో చాలా ముందున్నది. ఆ కాలములో నిర్లక్ష్యం చేయబడిన బాలికల బోధన కోసం ఎంతో వాదించింది. ఈమె విలియం క్యారీకి గొప్ప మద్దతు నిస్తూ, బైబిల్ అనువాద పనులలో, మిషనరీ కార్యకలాపాలలో చాలా సహాయం చేసింది. ఈ మిషన్‌కు ఆర్థికంగా, ఆధ్యాత్మికంగా మద్దతు ఇవ్వడంలో ఈమె కీలక పాత్ర పోషించింది, ఈమె 1800లో ఒక పాఠశాలను ప్రారంభించి, ఇంగ్లీష్ పిల్లల కోసం రెండు బోర్డింగ్ పాఠశాలలను కూడా నిర్వహించింది, దీని ఫీజులు సెరాంపూర్ మిషన్‌ను కొనసాగించడంలో సహాయపడింది. అలా చేయడం ద్వారా, ఈమె దాని ఆర్థిక, పరిపాలనను నిర్వహించింది, మిషన్ స్థిరత్వాన్ని నిర్ధారించింది. 5 జూలై 1818న, విలియం క్యారీ, జాషువా మార్ష్‌మన్, విలియం వార్డ్ ప్రతిపాదిత కొత్త “ప్రాచ్య సాహిత్యం, యూరోపియన్ సైన్స్‌లో ఆసియాటిక్ క్రిస్టియన్ మరియు ఇతర యువకుల బోధన కోసం కళాశాల నిమిత్తం, ఈమె రాసిన ప్రాస్పెక్టస్ జారీ చేశారు. ఆ విధంగా, సెరాంపూర్ కళాశాల పుట్టింది, ఇది ఈనాటికీ కొనసాగుతోంది.
హన్నా 1767 మే 13న ఇంగ్లాండ్‌లోని బ్రిస్టల్‌లో జాన్ షెపర్డ్ అనే రైతు, రేచెల్ లకు జన్మించెను. ఈమె విల్ట్‌ షైర్‌ లోని క్రోకర్టన్‌ లోని బాప్టిస్ట్ చర్చి పాస్టర్ అయిన జాన్ క్లార్క్ మనవరాలు. ఈమెకు ఎనిమిదేళ్ల వయసులోనే తల్లి చనిపోయింది. 1791లో హన్నా షెపర్డ్, జాషువా మార్ష్‌మన్‌ను వివాహం చేసుకున్నారు. 1794లో, ఈ జంట విల్ట్‌ షైర్‌ లోని వెస్ట్‌ బరీలీ నుండి బ్రిస్టల్‌ కు వెళ్లి, అక్కడ బ్రాడ్‌ మీడ్ బాప్టిస్ట్ చర్చిలో చేరారు.
హన్నా, జాషువా మార్ష్‌ మాన్, వారి ఇద్దరు పిల్లలతో కలిసి 29 మే 1799న పోర్ట్స్‌ మౌత్ నుండి భారతదేశానికి ప్రయాణించారు, ఫ్రెంచ్ నౌకాదళ దాడి బెదిరింపులు ఉన్నప్పటికీ, 13 అక్టోబర్ 1799న సురక్షితంగా సెరంపూర్ చేరుకున్నారు. మిషనరీల పట్ల ఈస్టిండియా కంపెనీ శత్రుత్వం కారణంగా వారు డానిష్ కాలనీలో స్థిరపడి, విలియం క్యారీ ద్వారా మిషన్ లో చేరితిరి. 1 మే 1800న, మార్ష్‌మాన్‌లు సెరాంపూర్‌లో రెండు విజయవంతమైన బోర్డింగ్ పాఠశాలలను ప్రారంభించారు, అక్కడే వారి కుమారుడు జాన్ క్లార్క్ మార్ష్‌ మన్ చదువుకున్నాడు. మిషన్ విస్తరించడంతో, జాన్ ఫౌంటెన్, విలియం వార్డ్, డేవిడ్ బ్రున్స్‌ డన్, విలియం గ్రాంట్‌లతో సహా మరిన్ని మిషనరీలు వచ్చారు. ఈమె, ఈమె భర్త, విలియం వార్డ్ పిల్లలందరి బాధ్యత వహించారు. విలియం కేరీ నలుగురు కుమారుల పెంపకం, విద్యను వీరే చేపట్టిరి.
హన్నా 80 ఏళ్ల వయసులో కన్నుమూశారు. ఈమె సెరాంపూర్ మిషన్ కుటుంబంలో జీవించియున్న చివరి సభ్యురాలు. సెరంపూర్ మిషన్ చాపెల్‌ లోని ఒక శాసనం ఈమె అంకితభావాన్ని గౌరవిస్తుంది, మిషన్‌కు మద్దతుగా మే 1800లో సెమినరీని ప్రారంభించడంలో ఈమె పాత్రను హైలైట్ చేస్తుంది. ఈమె 47 సంవత్సరాల సేవ, భక్తి, దయ ఎంతో గుర్తించబడింది.