నేటి విశ్వాస నాయకుడు
అబ్రహం లింకన్
పరలోక పిలుపు : 15 ఏప్రిల్ 1865
అమెరికా చరిత్రలో అత్యుత్తమ అధ్యక్షుడు, వేదాంతవేత్త, బానిసత్వ నిర్మూలకుడు. సత్యం, న్యాయం, సమానత్వం కోసం పోరాడుతూ ప్రాణాలర్పించిన మహానాయకుడు.
అబ్రహం లింకన్ (1809 – 1865) గొప్ప పేరున్న అమెరికా అధ్యక్షుడుగా ప్రపంచములోనే తెలియని వారు ఉండరు. ఈయనకు చిన్నతనం నుండి ఎదురైన కష్టాలే ఎత్తైన స్థానానికి ఎదగటానికి సహాయపడినవి. ఈయన కుటుంబ నేపథ్యం వల్ల వచ్చిన మానవతా దృష్టికోణం, ఆత్మవిశ్వాసం, నిబద్ధత, పేద జీవితం, విద్య, శ్రమ, దృఢ సంకల్పం ఇవన్నీ ఈయనను గొప్ప నాయకుడిగా, రాష్ట్రపతిగా మార్చాయి. దీని వల్ల సామాన్యుల బాధలు అర్ధం చేసుకోటానికి, ప్రజలకు న్యాయం చేయటానికి దోహదపడింది. మానవ హక్కులు, సమానత్వం, న్యాయం కోసం పోరాడాడు. ప్రజాస్వామ్యాన్ని కాపాడుతూ, పౌరయుద్ధాన్ని నడిపించాడు. అమెరికా అంతర్యుద్ధ సమయంలో దేశాన్ని ఏకతాటిపై నిలిపిన మహా నాయకుడు. బానిసత్వాన్ని నిర్మూలించడంలో అత్యంత కీలక పాత్ర పోషించి, గొప్ప పేరు గాంచాడు. విశ్వాస విషయములో కొన్ని పుస్తకముల ద్వారా సందేహాస్పదంగా ఉన్నప్పటికీ, కాలక్రమేణా, ముఖ్యంగా అంతర్యుద్ధం, ఈయన కుమారుల మరణం వంటి వ్యక్తిగత విషాదాల ద్వారా, దేవునిపై ఆధారపడటం మరింత పెరిగింది. ఈయన తరచుగా బైబిల్ను ఉటంకిస్తూ తన బహిరంగ ప్రసంగాలలో దేవుని విధానము ఎలాగుంటాదో మాట్లాడేవాడు. తరువాత తన వేదాంత ధోరణి ప్రత్యేకంగా గుర్తించదగినది. అంతర్యుద్ధం బానిసత్వం యొక్క పాపానికి దైవిక తీర్పు అని లింకన్ విశ్వసించాడు. దేవుని తీర్పుకు, దేశానికి పశ్చాత్తాపం అవసరం అని నమ్మాడు. ఈయన విశ్వాసం దేవునిపై నిజమైన, వినయపూర్వకమైన నమ్మకంగా పెరిగి, అధ్యక్షుడిగా తన పాత్రను దేవుని ఉన్నతమైన సంకల్పాన్ని నెరవేర్చే అవకాశంగా చూసారు. ఈయన విశ్వాసం ఏ సాంప్రదాయానికి పరిమితమైనది కాదు, కానీ వ్యక్తిగత జీవితానికీ, నైతికతకీ, నాయకత్వానికీ ప్రధాన ఆధారంగా నిలిచింది. ఈయన 1863లో థాంక్స్ గివింగ్ డేని జాతీయ సెలవుదినంగా ప్రవేశపెట్టాడు, అంతర్యుద్ధం సమయంలో, అమెరికన్లు ఈయన ఆశీర్వాదాల కోసం కృతజ్ఞతలు తెలుపుతూ, వైద్యం ఇంకా ఐక్యత కోసం ప్రార్థించమని కోరారు. ఈయన తన గెట్టిస్ బర్గ్ చిరునామాలో ప్రముఖంగా పేర్కొన్నట్లుగా “ప్రజల యొక్క, ప్రజల ద్వారా, ప్రజల కొరకు” ప్రభుత్వంపై నమ్మకంతో ప్రజాస్వామ్యం కోసం గట్టిగా వాదించాడు. ప్రజాస్వామ్యం యొక్క ఈ దృక్పథం తరువాత ప్రేరణ పొంది, ప్రపంచంలోని అనేక దేశాలచే స్వీకరించబడి, ఆధునిక ప్రజాస్వామ్య పాలనను రూపొందించింది. లింకన్ అంతర్యుద్ధం తర్వాత బానిసత్వం రద్దుచేశాడు. వెంటనే నల్లజాతి అమెరికన్లకు ఓటు హక్కు కోసం, ప్రయత్నాలను మరింత ముందుకు తీసుకెళ్లేలోపు, వ్యతిరేకులచేత ఈయన హత్యకు గురయ్యాడు. ఫలితంగా నల్లజాతి వారికి ఓటు హక్కు పొందటానికి వంద సంవత్సరాలు పట్టింది. అది కూడా మార్టిన్ లూథర్ కింగ్ తీవ్ర పోరాటం వల్ల సుసాధ్యమయింది. 1861లో అబ్రహం లింకన్ తన మొదటి అమెరికా అధ్యక్ష పదవీ ప్రమాణ స్వీకార ప్రారంభోత్సవంలో ఉపయోగించిన లింకన్ బైబిల్ ను యుఎస్ ప్రెసిడెంట్లు బరాక్ ఒబామా, డొనాల్డ్ ట్రంప్ లు లింకన్ వారసత్వాన్ని గౌరవించడానికి వారి ప్రమాణ స్వీకార వేడుకల సమయంలో అదే బైబిలును ఉపయోగించారు. వాషింగ్టన్, D.C.లోని న్యూయార్క్ అవెన్యూ ప్రెస్బిటేరియన్ చర్చి సర్వీస్ కు హాజరవ్వుతూ ఉండేవాడు.
లింకన్ ఫిబ్రవరి 12, 1809న కెంటుకీలోని పూరి గుడిసెలో థామస్, నాన్సీ లింకన్లకు జన్మించాడు. ఈయన కుటుంబం ఆంగ్ల మూలాలకు చెంది, తరాలకు ముందు వలస వచ్చారు. అతని తండ్రి, థామస్, 1816లో కుటుంబాన్ని ఇండియానాకు తరలించి, స్వేచ్ఛా రాష్ట్రంలో స్థిరపడ్డారు. ఈయన కుటుంబం బాప్టిస్ట్ సంఘ సభ్యులు. ఈయన స్వంతంగానే కస్టపడి విద్య నభ్యసించాడు, స్వీయ-బోధన, బైబిల్, ఇతర క్లాసిక్ లను చదివాడు. యువకుడిగా, వివిధ ఉద్యోగాలు చేశాడు, శారీరక శ్రమ మరియు కుస్తీలో నైపుణ్యం సంపాదించాడు. 1830లో ఇల్లినాయిస్కు వెళ్లి, భిన్నమైన విలువల కారణంగా, ముఖ్యంగా విద్యపై తన తండ్రికి దూరమయ్యాడు. ఈయన చివరికి న్యూ సేలంలో స్థిరపడి, దుకాణాన్ని నడుపుతూ, వ్యాపార వైఫల్యం తరువాత, స్వతంత్రంగా న్యాయ విద్యను అభ్యసించి, ప్రాక్టీస్ చేస్తున్న న్యాయవాది అయ్యాడు. తరువాత రాజకీయాలలో చేరి, నిస్వార్ధతతో అంచెలంచెలుగా ఎదిగి అత్యున్నత స్థాయికి చేరుకున్నాడు.
అబ్రహం లింకన్ మార్చి 4, 1861న యునైటెడ్ స్టేట్స్ 16వ ప్రెసిడెంట్ అయ్యాడు. ఈయన అధ్యక్ష పదవిలో దక్షిణాది రాష్ట్రాల వేర్పాటును ఎదుర్కొన్నాడు, ఇది తన ప్రారంభ వారాలకే అంతర్యుద్ధానికి దారితీసింది. 1863లో, ఈయన విముక్తి ప్రకటనను జారీ చేశాడు, సమాఖ్య రాష్ట్రాలలో బానిసలుగా ఉన్న ప్రజలందరూ స్వేచ్ఛగా ఉన్నారని ప్రకటించారు. ఈయన 13వ సవరణను ప్రోత్సహించాడు, ఇది అమెరికాలో బానిసత్వాన్ని శాశ్వతంగా రద్దు చేసింది. ఈయన ఫెడరల్ ప్రభుత్వాన్ని బలోపేతం చేసి, పునర్నిర్మాణానికి పునాది వేశాడు.
అంతర్యుద్ధం ముగిసిన కొద్ది రోజులకే ఏప్రిల్ 14, 1865 రాత్రి లింకన్ హత్యకు గురయ్యాడు. అతను వాషింగ్టన్, D.C.లోని ఫోర్డ్స్ థియేటర్లో ‘అవర్ అమెరికన్ కజిన్’ అనే పేరుతో ఒక నాటకానికి హాజరవుతున్నప్పుడు, కాన్ఫెడరేట్ సానుభూతిపరుడైన జాన్ విల్కేస్ బూత్ తల వెనుక భాగంలో కాల్చాడు. ఈయన్ను పీటర్సన్ హౌస్ కి తీసుకెళ్లగా, అక్కడ రాత్రిపూట అపస్మారక స్థితిలో ఉండి, మరుసటి రోజు ఉదయం, 7:22 గంటలకు మరణించాడు, హత్యకు గురైన మొదటి అమెరికా ప్రెసిడెంట్ అయ్యాడు. ఈయన మరణం దేశాన్ని దిగ్భ్రాంతికి గురిచేసింది, తీవ్ర శోకసంద్రంలో మునిగిపోయింది. ఈయన స్వేచ్ఛ, ఐక్యత కోసం అమరవీరుడుగా గౌరవించబడ్డాడు. ఈయన అంత్యక్రియల ఊరేగింపు అనేక నగరాల్లో భారీ సమూహాలను ఆకర్షించింది. అమెరికాలోనే కాకుండా ప్రపంచవ్యాప్తంగా అబ్రహం లింకన్ గౌరవార్థం అనేక స్మారక చిహ్నాలు నిర్మించబడ్డాయి. నాటి లింకన్ నైతిక విలువలు – నిజాయితీ, సమానత్వం, దయ, నాయకత్వం, సహనశీలత, ధైర్యం. ఇలాంటి విలువలు నేటి సమాజ నాయకులు అనుసరించాల్సినవి కాదా?
— జాన్ మైఖేల్, రాజమండ్రి.