ప్రొఫె.ప్రకాష్ గంటెల, గుంటూరు (ఆంధ్ర ప్రదేశ్) వాస్తవ్యులు. తన పద్నాల్గవ ఏట ఒక వి.బి.యెస్. (సండే స్కూల్) లో ప్రభువును తన సొంత రక్షకునిగా అంగీకరించారు. ఆ తర్వాత ఆధ్యాత్మిక జీవితంలో వెనుక బడి మళ్లీ తన ఇరవై ఒకటో ఏట ప్రభువుకు పునః సమర్పించుకున్నారు. 1992 మే నెలలో ప్రభువు పిలుపు మేరకు సేవకు వచ్చారు. మొదట భారతీయ విద్యార్థి సువార్త సమాఖ్యలో పని చేస్తూ కళాశాల విద్యార్థులకు క్రీస్తు సువార్త ప్రకటించడంలో దాదాపు ఇరవై ఏళ్ళు శ్రమించారు. పదమూడున్నర ఏళ్లు ఆ సంస్థ పత్రిక ‘విద్యార్థి జ్వాల’కు ఎడిటర్ గా పనిచేశారు. ఈ కాలంలోనే తెలుగు క్రైస్తవులను జాగృతం చేసి, వారిని వాక్యంలో విద్యావంతుల్ని చేసే వందల వ్యాసాలు రచించారు, అనువదించారు, సంపాదకీయాలూ రాశారు.
ఆ తర్వాత తాను మారుమనస్సు పొందిన సంఘంలో కొన్నేళ్ళ పాటు సండే స్కూల్, యువజన సేవలో ఉంటూనే పెద్దలకు వాక్య పరిచర్య చేశారు. అదే సమయంలో “రవి జకరియస్ ఇంటర్నేషనల్ మినిస్ట్రీస్” లో కొంత కాలం జాతీయ ఫ్యాకల్టీగా పని చేశారు.
నాస్తికులు, అన్య మత గురువులు, పండితులతో చర్చల్లో పాల్గొని, క్రైస్తవ విశ్వాసం పక్షాన వాదించారు. జన విజ్ఞాన వేదిక, ఇతరత్రా నాస్తికులతో సైతం తలపడి ఆస్తిక విశ్వాసాన్ని ధీటుగా సమర్ధించారు. క్రైస్తవేతర విశ్వాసులతో, నాస్తికులతో స్నేహ పూర్వక చర్చలు చేయడానికి స్థాపించిన “క్రిస్టియన్ థింకర్స్ ఫోరమ్” కు వీరు సహ వ్యవస్థాపికులుగా ఉన్నారు.
కొన్నేళ్ల పాటు “రక్షణ టీవీ”లో “అసలైన ప్రశ్న సిసలైన జవాబు” కార్యక్రమంలో ప్రధాన వక్తగా ఉంటూ విశ్వ వ్యాప్తంగా తెలుగు క్రైస్తవ ప్రజానీకానికి వాక్య సందేహాలను నివృత్తి చేశారు. ఇపుడు యూట్యూబ్ ద్వారా కూడా ప్రపంచ తెలుగు క్రైస్తవులకు వాక్య పరిచర్య చేయడమే గాక, ఇతర విశ్వాసులకు క్రీస్తు వైశిష్ట్యాన్ని చాటుతున్నారు.
కొంత కాలం సామాజిక సేవలోనూ తనదైన పాత్ర పోషించారు. కొన్నేళ్ల పాటు క్రైస్తవ విలువలతో విద్యను అందించాలన్న తపనతో “లోగోస్ పబ్లిక్ స్కూల్” ను స్థాపించడంలో కీలక పాత్ర పోషించి, ఆ పాఠశాలకు ప్రిన్సిపల్ గా వ్యవహరించారు.
బీటెక్, ఎంసీయే, ఎంబీయే విద్యార్థులకు చాలా కాలం ఇంగ్లీష్, కమ్యూనికేషన్ స్కిల్స్ బోధించారు. ఇప్పటికీ విద్యార్థి లోకానికి వ్యక్తిత్వ వికాసంలో, విద్యలో రాణించడంలో, కెరీర్ ఎన్నుకోవడంలో సూచనలనిస్తూ వారి ఉన్నతికి కృషి చేస్తున్నారు.
క్రైస్తవ లోకాన్ని వాక్యంలో సుశిక్షితం చేయడానికి వీరు కొన్నేళ్ల క్రితం “వెరిటాస్ బైబిల్ ఇన్స్టిట్యూట్” ను స్థాపించి అనేకమంది సంఘ నాయకులకు, కాపరులకు, విశ్వాసులకు వాక్యంలో, సువార్తీకరణలో, విశ్వాస సమర్తనలో తర్ఫీదు ఇస్తూ వస్తున్నారు.
మరో పక్క క్రైస్తవ అపాలజిస్ట్ గా, బైబిల్ టీచర్ గా, ఇవాన్జలిస్ట్ గా అనేక సంఘాల్లో, జాతీయ అంత్జాతీయ క్రైస్తవ వేదికల పైన వాక్య ప్రబోధం చేస్తూ క్రీస్తును సేవిస్తున్నారు.
